Nenne’bang dipa’pakilalan lan kamenomban passakke rampanan kapa‘ kumua ia ke lanmiki’ tananan dapo’ disanga misa’ mora, tae’ tu la losong sia madaoan sangadinna misa’ lan kasipulungan sangkalebu tallang. Susi dukato tu passanan tengko, tae’ tu ladibellakanni kumua den tu magasa na den tu maringgan. Biasa denbangpa pa’tangaran kumua belanna ia tu muane iamo Kapala tanan dapo’, dadi ia tu baine sipatu mengkaola lako muanena.
Ullendui’ pa’basanta anna pamalesoi Rasulu’ Paulus kumua la muane (ambe’) la baine (indo’) sia anak, pada den nasang passanan tengkona. Muane sipatu umpakaboro’ bainena, na ia tu baine sipatu tunduk lako muanena, na ia tu pia sipatu unturu’ peada’na to matuanna (ay.18-20). Napamata’tak Paulus te pangadaran belanna ia tu ada’na to Yahudi attu iato, ia tu muane inang mandu dipamalangka’ dio kalena tu kuasa ma’parenta lan tananan dapo’. Iamoto anna ia tumai baine lan tanan dapo’ sangtinti kaunanna muanena. Ia tu muane ma’dinbang untantang punala bainena, na ia tomai baine tae’ anna ma’din umpalaku kasitantangan lako muanena.
Iamoto anna pamalesoi Paulus kumua moiraka anna dipokada kumua ia tu baine sipatu tunduk lako muanena, apa ia tu muane manassa lanapakaboro’ tu bainena. Susi dukato tu tomatua lako anakna, tae’ anna ma’din umpa’di’i tu anakna sangadinna lanapanundu’ sia na adai’ melo, na ia tu anak sipatu lanaperangi tu pangadaranna to matuanna, belanna iamoto tu pa’poraian-Na Puang Matua.
Iamoto la ambe’, la indo’, la anak, sipatu tontong siala mase sia sipakaboro’ lan tanan dapo’ belanna iamoto lamendadi oto’na kamasokanan-Na Puang tama tananan dapo’. Amin.